Binəqədi rayonunda Milli Qəhrəman Fərhad Hümbətovun anım mərasimi keçirildi

Aprelin 1-də Binəqədi rayonunda ölkəmizin suverenliyi və ərazi bütövlüyü uğrunda gedən döyüşlərdə xüsusi rəşadət göstərərək Azərbaycan Respubliasının Milli Qəhrəmanı adına layiq görülmüş şəhid Fərhad Hümbətovun anım mərasimi keçirildi.
Tədbirdə Rayon İcra Hakimiyyətinin başçısı Xaləddin İsgəndərov, Rayon İcra Hakimiyyəti başçısının müavinləri, Rayon İcra Hakimiyyəti başçısı Aparatının şöbə müdirləri, Hüquq-mühafizə orqanlarının rəhbərləri, məktəbəqədər və orta təhsil, səhiyyə və digər müəssisələr, İctimai birliklər, rayon ziyalıları, ağsaqqalları, İctimai şuranın üzvləri, YAP Binəqədi rayon təşkilatının fəalları və gənclər iştirak etdilər.
Tədbirdən öncə Rayon İcra Hakimiyyətinin başçısı Xaləddin İsgəndərov, Milli Qəhrəmanın anası Salatın Hümbətova, hüquq-mühafizə orqanlarının rəhbərləri Milli Qəhrəmanın abidəsi önünə gül dəstələri qoymuşdurlar.
Sonra tədbiri açıq elan edildi və Milli Qəhrəmanın xatirəsi bir dəqiqəlik sükutla yad edildi.
Tədbirdə çıxış edən Milli Qəhrəman Fərhad Hümbətovun sinif rəhbəri Sayad Rəfiyev, Binəqədi Rayon Səfərlik və Hərbi Xidmətə Çağırış İdarəsinin rəisi Mehman Qurbanov, Respublika Milli Qəhrəmanları Tanıtma İctimai Birliyinin sədri Elşən Uluxanlı belə tədbirlərin keçirilməsinin gənclərin vətənpərvərlik tərbiyəsində mühüm rol oynadığını bildirdilər. Çıxış edənlər həmçinin, vətən uğrunda canlarını qurban vermiş oğullarımızın ailələrinə dövlət tərəfindən hərtərəfli qayğı göstərilməsinə toxunaraq bu diqqətin gənclərin vətənpərvərlik və dövlətçiliyə sədaqət ruhunda tərbiyəsində müstəsna rol oynadığını iştirakçıların diqqətinə çatdırdılar.
Sonra çıxış edən  Milli Qəhrəmanın anası Salatın Hümbətova oğlunun keçdiyi qısa, lakin mənalı və şərəfli həyat yolundan danışaraq, dövlətin onlara göstərdiyi diqqət və qayğını minnətdarlıqla qeyd etdi.
Daha sonra tədbirdə Rayon İcra Hakimiyyətinin başçısı Xaləddin İsgəndərov çıxış edərək Azərbaycanın ərazi bütövlüyü uğrunda həyatını fəda edərək şəhidlik zirvəsinə ucalmış Fərhad Hümbətovun timsalında şəhidlərimizin, milli qəhrəmanlarımızın cəsurluğu və rəşadətini Vətənini sevən hər kəs üçün örnək kimi səciyyələndirdi. Natiq şəhid ailələrinin dövlət qayğısı ilə əhatə olunmasına diqqət çəkərək bu məsələnin möhtərəm Prezidentimiz İlham Əliyev tərəfindən daim diqqət mərkəzində saxlandığını bildirdi. Silahlı Qüvvələrin Ali Baş Komandanı cənab İlham Əliyevin rəhbərliyi ilə əzəli yurd yerlərimizin azad olunacağı və qələbə sevinci yaşayacağımızı da Rayon İcra Hakimiyyətinin başçısı əminliklə vurğuladı.
Anım tədbiri  Akademik Milli Dram Teatrının aktyorlarınn ifasında bədii kompozisiyanın təqdim edilməsi və məktəblilər tərəfindən Milli Qəhrəmanın abidəsi önünə güllərin düzülməsi ilə yekunlaşdı.