Binəqədi rayonunda Ulu Öndər Heydər Əliyevin anadan olmasının 93-cü ildönümü ilə əlaqədar silsilə tədbirlər keçirilir

Binəqədi rayonunda Ulu Öndər Heydər Əliyevin anadan olmasının 93-cü ildönümü ilə əlaqədar silsilə tədbirlər keçirilir.
Binəqədi Rayon İcra Hakimiyyəti və Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının birgə təşkilatçılığı ilə Ulu Öndər Heydər Əliyevin anadan olmasının 93-cü ildönümü ilə əlaqədar “QHT-lər arasında atıcılıq çempionatı” keçirildi.
Bakı Stend Atıcılığı üzrə İdman Kompleksində təşkil olunan Çempionatda QHT-lərin Azəri Yurdu gənclərin İctimai Birliyi, Bakı Gənclər Klubu, Sağlam Düşüncə gənclər İctimai Birliyi, İstedadlı Əlillər İctimai Birliyi, Konstitusiya Araşdırmalar Fondu, Qarabağ müharibəsi veteranları, Binəqədi rayon İcra Hakimiyyətinin əməkdaşları, YAP Binəqədi rayon təşkilatının fəal gəncləri, Azərbaycan Tələbələr Birliyinin nümayəndələri və rayon ictimaiyyəti iştirak etdi.
Başlanğıc, yarımfinal, final olmaqla 3 mərhələ üzrə keçirilən yarışıda birinci yeri Veteranlar, ikinci yeri YAP Binəqədi rayon gəncləri, üçüncü yeri isə İstedadlı Əlillər İctimai Birliyi komandası qazandı.
Mayın 5-də çempionatın qaliblərinin mükafatlandırılması mərasimində Binəqədi Rayon İcra Hakimiyyətinin başçısı Xaləddin İsgəndərov və Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, millət vəkili Azay Quliyev iştirak etdilər.
Həmin gün Binəqədi Rayon İcra Hakimiyyətinin başçısı Xaləddin İsgəndərov və Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, millət vəkili Azay Quliyevin iştirakı ilə “Heydər Əliyev və Azərbaycan gəncliyi” mövzusunda gənclərlə görüş keçirildi.
Çay süfrəsi ətrafında təşkil olunan tədbirdə mart 2016-cı il tarixində ölkə başçısı İlham Əliyevin təşəbbüsü ilə reallaşan və hər kəs tərəfindən bəyənilən “Ölkəmizi Tanıyaq” layihəsində iştirak edən Binəqədi məktəbliləri, onların valideynləri və müəllimləri, eləcə də, fəal gənclər iştirak etdilər.
Tədbir başlamazdan öncə iştirakçılar Ulu öndər Heydər Əliyev və torpaqlarımızın azadlığı uğrunda canından keçən şəhidlərimizin xatirəsini bir dəqiqəlik sükutla yad etdilər.
Daha sonra “Ölkəmizi Tanıyaq” layihəsi haqqında tədbir iştirakçılarına geniş məlumat verilərək, məktəblilərin tur-aksiya çərçivəsində Naxçıvan Muxtar Respublikasına baş tutan səfəri barədə video-çarx təqdim olundu.
Tədbirdə çıxış edən Binəqədi Rayon İcra Hakimiyyətinin başçısı Xaləddin İsgəndərov və millət vəkili Azay Quliyev Ümummilli liderimiz Heydər Əliyevin öz siyasətində daima gənclərə qayğı göstərməsindən, onların bir fərd kimi yetişməsinə xüsusi önəm verməsindən və  onun respublika rəhbərliyinə gəldiyi ilk dövrlərdən gənclərin himayədarı kimi çıxış edərək sağlam düşüncəli yeni nəslin yetişdirilməsi sahəsində misilsiz bəhs etdilər.
Daha sonra “Ölkəmizi Tanıyaq” layihəsi iştirakçıları olan Binəqədi məktəblilərinin birliyini simvolizə edən tort kəsildi.
Tədbirdə iştirak edən məktəblilər, onların valideynləri və müəllimləri layihə barəsində öz təəsüratlarını bölüşərək, müasir Azərbaycan gəncliyinə yaradılan bu imkanlara görə ölkə başçısına minnətdarlıqlarını bildirdilər.
“Ölkəmizi Tanıyaq” layihəsi iştirakçıları olan Binəqədi məktəblilərinin ifasında şer nümunələri təqdim olunduqdan sonra, onlara “Ölkəmizi Tanıyaq” tur-aksiyası çərçivəsində Naxçıvan MR-da Binəqədi rayonunu layiqli təmsil etdiklərinə görə sertifikatlar təqdim olundu.
Tədbirin sonunda Binəqədi Rayon İcra Hakimiyyətinin başçısı Xaləddin İsgəndərov və millət vəkili Azay Quliyevin iştirakı ilə xatirə fotosu çəkildi.