Livtalı qonaqlar Binəqədi rayonunda oldular

Noyabrın 23-də Litva Bələdiyyələr İttifaqının prezidenti, Druskininkay şəhərinin meri Ricardas Malinauskas,  Litva Bələdiyyələr İttifaqının vitse-prezidenti, Paqeqai əyalətinin meri Virginijus Komskis, Litva Bələdiyyələr İttifaqının müşaviri, Avropa İttifaqındakı təmsilçisi Lina Sabaitiene,  Akmyane əyalətinin icraçı direktoru Aromeda Lauciene, Trakay şəhər bələdiyyəsinin deputatı  Jelena Jocionienenin  daxil olduğu nümayəndə heyəti Azərbaycana səfər çərçivəsində Binəqədi rayonunda oldular.
Nümayəndə heyəti ilk öncə Biləcəri bələdiyyəsində tanışlıq xarakterli görüş keçirildi. Görüşdə Azərbaycan Şəhər, Qəsəbə və Kənd Bələdiyyələrinin Milli Assosasiyalarının sədrləri, sədr müavinləri və əməkdaşları, eyni zamanda Binəqədi rayon bələdiyyələrinin sədrləri  iştirak etdilər.
Tədbirdə Azərbaycan Qəsəbə Bələdiyyələri Milli Assosiasiyasının  sədri Hümbət Hüseynov çıxış edərək, iki ölkənin şəhərləri, bələdiyyələri arasında əməkdaşlıq əlaqələrinin hazırkı vəziyyəti və perspektivləri barədə məlumat verdi.
Daha sonra çıxış edən Binəqədi rayonu bələdiyyələrinin sədrləri qonaqlara rayonda gedən abadlıq-quruculuq işləri, sakinlərin istirahətinin səmərəli təşkili üçün yaradılan şərait və “Açıq qapı” günləri barədə məlumat verdilər.
Binəqədi rayon bələdiyyələrinin hər biri ilə ayrı-ayrılıqda Litva bələdiyyə nümayəndələri arasında qarşılıqlı fikir mübadiləsi aparıldı, təcrübələrin bölüşülməsi, həmçinin qardaş bələdiyyə formatında əməkdaşlığın perspektivləri müzakirə olundu.
Öz növbəsində Litva Bələdiyyələr İttifaqının prezidenti, Ricardas Malinauskas və bələdiyyələrin nümayəndələri yerli hakimiyyət olaraq, həyata keçirdikləri tədbirlər barədə məlumat verdi, Binəqədi rayonu ilə tanışlıqdan məmnunluqlarını ifadə edərək,  Binəqədi bələdiyyələri ilə əlaqələrin möhkəmləndirilməsi və genişləndirilməsi perspektivləri barədə təkliflərini səsləndirdi.
Tədbirdən sonra nümayəndə heyəti bələdiyyə sədrləri ilə birlikdə Binəqədi rayonunda yerləşən Heydər məscidini ziyarət etdi, sonra Heydər parkında ucaldılmış Ümummilli Lider Heydər Əliyevin abidəsi və parkı ilə tanış oldular.          
Sonda Binəqədi rayonu bələdiyyələri adından litvalı qonaqlara xatirə hədiyyələri təqdim olundu.
Görüşdə Binəqədi Rayon İcra Hakimiyyəti başçısı aparatının Ərazi idarəetmə və yerli özünüidarəetmə orqanları ilə iş şöbəsinin müdiri Ramiz Göyüşov iştirak etdi.