Binəqədi rayonunda 12 Avqust - “Beynəlxalq Gənclər günü” münasibətilə “Gənclik həftəsi” layihəsinə iməcilik aksiyası ilə start verildi

05 avqust 2017 | 11:00

12 Avqust - “Beynəlxalq Gənclər günü” münasibətilə Binəqədi Rayon İcra Hakimiyyəti, Yeni Azərbaycan Partiyası Binəqədi Rayon Təşkilatı və Binəqədi Rayon Gənclər və İdman İdarəsinin birgə təşkilatçılığı ilə start verilmiş “Gənclik həftəsi” layihəsi çərçivəsində akademik Zərifə Əliyeva adına istirahət parkı, “Zeytunluq” adlanan ərazi və Mir Cəlal küçəsi 3, 5,7, 9, 11, 15 ünvanlarında iməcilik aksiyası keçirildi.
     Aksiyada Binəqədi Rayon İcra Hakimiyyətinin gənc əməkdaşları, Gənclər və İdman İdarəsinin kollektivi, Yeni Azərbaycan Partiyası Binəqədi Rayon Təşkilatının fəal üzvləri, 2 saylı sahə inzibati ərazi dairəsi üzrə nümayəndəliyin, Mənzil-Kommunal İstismar Sahələrinin əməkdaşları və ASAN könüllüləri iştirak etdilər.
    Aksiya zamanı Binəqədi gəncləri M.Cəlal küçəsi 3, 5, 7, 9, 11, 15 saylı binaların həyətlərində, məhəllədaxili parklarda, o, cümlədən 6-cı mikrorayonda Zeytunluq ərazisində təmizlik işləri apardılar. Aksiya çərçivəsində ətraf mühit insan sağlamlığı üçün zərərli olan müxtəlif məişət və polietilen tullantılarından təmizləndi, abadlıq işləri görüldü.
    Binaların həyətindəki uşaq qurğuları, oturacaqlar, söhbətgahlar təmizlənərək rəngləndi. Eyni zamanda “Çoxmənzilli binaların təmiri” tədbirlər planına əsasən təmir edilmiş M.Cəlal küçəsində yerləşən binaların girişlərində də təmizlik işləri həyata keçirildi.
    Aksiya zamanı gənclərin bu təşəbbüsü sakinlər tərəfindən maraqla qarşılandı və onlar bu nümunəvi addıma görə gənclərə təşəkkür etdilər.
    Aksiya bitdikdən sonra çay süfrəsi ətrafında gənclər üçün əyləncəli proqram təşkil edildi və aksiya xoş anlarla yekunlaşdı.

Keçidlər