Binəqədi rayonunda “İlin 105 Qızıl beyni” adlı elmi-praktik konfrans keçirildi

13 sentyabr 2017-ci il tarixində Binəqədi rayonunda 2016-2017-ci dərs ilinin yekunları və yeni tədris ilində qarşıda duran vəzifələrə həsr olunmuş “İlin 105 Qızıl Beyni” adlı elmi-praktik konfrans keçirildi.
Tədbirdə Binəqədi Rayon İcra Hakimiyyətinin başçısı Xaləddin İsgəndərov, Azərbaycan Milli Elmlər Akademiyasının vitse-prezidenti, Milli Məclisin Elm və təhsil komitəsinin sədri İsa Həbibbəyli, Y.Məmmədəliyev adına Neft-Kimya Prosesləri İnstitutunun direktoru, akademik  Vaqif Abbasov , millət vəkilləri Musa Qasımlı, Kamaləddin Qafarov, Bakı şəhəri üzrə Təhsil İdarəsinin müdir müavini Hüseyn Əsgərov, rayonun tədris müəssisələrinin rəhbərləri, ali məktəblərə qəbul zamanı yüksək nəticə göstərmiş orta məktəb məzunları, rayon ictimaiyyətinin nümayəndələri iştirak etdilər.
İlk öncə məzunlar Yeni Azərbaycan Partiyası Binəqədi Rayon Təşkilatının inzibati binasının qarşısında yerləşən Ulu öndər Heydər Əliyevin abidəsi önünə gül dəstələri qoyaraq, dahi şəxsiyyətin ruhuna öz dərin ehtiramlarını bildirdilər.
Konfrans rayonun istedadlı gənci Aydan İlxaslının “Qarabağ şikəstəsi” muğamı ilə start götürdü, daha sonra səhnəyə qalxan rayonun 179 saylı məktəbinin şagirdi Aysu Əsgərova “Azərbaycan” şeirini səsləndirdi və Cocuq Mərcanlıya həsr edilmiş filmin fonunda Aysu və Əsma Məmmədova bacılarının “Azərbaycan” musiqisinin ifası ilə başlandı.
Daha sonra tədbir rayonun fəal gənclərinin hazırladıqları Azərbaycan Respublikasının dövlət himnin fonunda kompozisiya ilə açıq elan edildi.
Sonra Binəqədi Rayon İcra Hakimiyyəti başçısının müavini Aygün Əliyeva “Binəqədi rayonunda 2016-2017-ci tədris ilin yekunları və yeni tədris ilinə hazırlıqla bağlı görülmüş işlər” barədə hesabat məruzəsi ilə çıxış etdi. Aygün Əliyeva bildirdi ki, təhsil Prezident İlham Əliyev tərəfindən Azərbaycanın davamlı inkişafının əsas amillərindən biri hesab edilir. Məhz bu sahəyə göstərilən  diqqət və qayğı sayəsində Azərbaycan təhsili son illər özünün yeni inkişaf dövrünə qədəm qoyub, xeyli nailiyyətlər əldə edilib. Təhsilin inkişafı üçün tələb olunan şərtlərdən biri təhsilin maddi-texniki bazasının inkişaf etdirilməsi, yüksək səviyyəli təhsil mühitinin yaradılmasıdır. Bu baxımdan ölkəmizdə təhsilə dövlət səviyyəsində göstərilən diqqət və qayğının nəticəsidir ki, ötən 10 il ərzində Binəqədi rayonunda 25 məktəbdə əsaslı təmir aparılıb. Eyni zamanda, 18 məktəbdə əlavə korpuslar tikilib istifadəyə verilib. Bu il rayonumuzun orta məktəblərini bitirən 2368 məzundan 1417-i ali məktəblərə qəbul olub. 600 və 600-dən yuxarı bal toplayanların sayı əvəllki illərə nisbətdə göstəricilər yüksələrək 105 nəfər olub. 
Hesabat çıxışından sonra ali məktəblərə qəbul zamanı yüksək nəticə göstərmiş 267 nömrəli tam orta məktəbin məzunu İlkin Feyzullayev, 135  nömrəli tam orta məktəbin məzunu Vəli Quliyev, 205 nömrəli tam orta məktəbin məzunu Arzu Qubadzadə əldə etdikləri təhsil uğurlarından danışdılar.
Daha sonra çıxış edənlər Azərbaycan Milli Elmlər Akademiyasının vitse-prezidenti, əməkdar elm xadimi, Milli Məclisin Elm və təhsil komitəsinin sədri İsa Həbibbəyli, AMEA-nın həqiqi üzvü, Y.Məmmədəliyev adına Neft-Kimya Prosesləri İnstitutunun direktoru  Vaqif Abbasov  və  millət vəkili Musa Qasımlı öz çıxışlarında hazırda dünya standartlarına cavab verə biləcək səviyyədə, yüksək keyfiyyətli təhsil almaq üçün dövlət tərəfindən hərtərəfli şəraitin yaradıldığını bildirdilər.
Çıxışlara yekun vuran Binəqədi Rayon İcra Hakimiyyətinin başçısı Xaləddin İsgəndərov Azərbaycanda təhsilə göstərilən dövlət qayğısından danışdı. Xaləddin İsgəndərov Ulu Öndər Heydər Əliyevin siyasi kursunu layiqincə davam etdirən Prezident İlham Əliyevin yürütdüyü, inkişaf və tərəqqiyə, ölkəmizin milli maraqlarına söykənən siyasətin mühüm istiqamətlərindən birinin təhsil siyasəti olduğunu vurğuladı. Natiq Azərbaycanda təhsilin inkişafının birbaşa dövlət başçısının diqqət mərkəzində olduğu bildirdi.
Konfransın sonunda ali məktəblərə qəbul zamanı yüksək nəticələr göstərmiş məzunlar Binəqədi Rayon İcra Hakimiyyəti tərəfindən təltif olundular.
Yekunda ali məktəblərə qəbul imtahanlarında yüksək nəticələr göstərərək tələbə adını qazanmış gənclərlə xatirə şəkli çəkdirildi.
Konfransa məzunların ifasında “Bizim Zaman” mahnısı ilə yekun vuruldu.
Konfransdan sonra iştirakçılar üçün çay süfrəsi təşkil edildi və tədbir qeyri-rəsmi formatda davam etdi.