“Müasir İqtisad Məktəbi” layihəsinin açılış mərasimi keçirildi

   Binəqədi Rayon İcra Hakimiyyəti başçısının 18 noyabr 2014-cü il tarixli 230 saylı sərancamı ilə təsdiq olunan Tədbirlər Planının 1.11 bəndinin icrası məqsədilə 22 noyabr 2014-cü il tarixdə Yeni Azərbaycan Partiyası Binəqədi Rayon Təşkilatının inzibati binasında Binəqədi Rayon İcra Hakimiyyəti, Rayon Gənclər və İdman İdarəsi və Yeni Azərbaycan Partiyası  Binəqədi Rayon Təşkilatının birgə təşkilatçılığı ilə “Müasir İqtisad Məktəbi” layihəsinin açılış mərasimi keçirildi.
   Tədbirdə Binəqədi Rayon Gənclər və İdman İdarəsinin rəisi Qüdsi Bayramov, Yeni Azərbaycan Partiyası Binəqədi Rayon Təşkilatının aparat rəhbəri Qabil Qafarov, Azərbaycan Əmək və Sosial Münasibətlər Akademiyasının Elmi işlər üzrə prorektoru Mobil Məcidov, “Modern Marketing Group” şirkətinin təsisçisi Yusif Vəliyev və gənclər iştirak etdiər.
   Tədbir layihədə iştirak etmək hüququ qazanmış gənclərin tərəfindən hazırlanmış videonun nümayişi ilə başlandı.
Sonra layihənin rəhbəri, Azərbaycan Əmək və Sosial Münasibətlər Akademiyasının tələbəsi və Yeni Azərbaycan Partiyası Binəqədi Rayon Təşkilatının fəal gənci Mahmud Məmmədzadə giriş sözü ilə çıxış etdi. O, layihənin həyata keçirilməsində göstərilən dəstəyə görə təşəkkürünü bildirdi.
Yeni Azərbaycan Partiyası Binəqədi Rayon Təşkilatının aparat rəhbəri Qabil Qafarov çıxış edərək bildirdi ki, partiyada gənclərin bilik və bacarıqlarının inkişaf etdirilməsi üçün əlverişli şərait yaradılır. Onların istək və arzularına uyğun olaraq müxtəlif kurslar təşkil olunur ki, bu da gənclər tərəfindən rəğbətlə qarşılanır.
   Sonra Binəqədi Rayon Gənclər və İdman İdarəsinin rəisi Qüdsi Bayramov çıxış edərək rayonda gənclərin şəxsi təşəbbüsləri əsasında müxtəlif layihələrin reallaşdırılmasının artıq ənənə halını aldığını bildirdi. Natiq gənclərin təkcə Binəqədi rayonunda deyil, eləcə də ölkəmizdə həyata keçirilən mühüm layihələrdə müsbət fəaliyyətləri ilə özlərini doğrultduqlarını bildirdi və iştirakçılara uğurlar arzuladı.
   Tədbir  “Modern Marketing Group” şirkətinin təsisçisi Yusif Vəliyevin  və Azərbaycan Əmək və Sosial Münasibətlər Akademiyasının Elmi işlər üzrə prorektoru Mobil Məcidovin çıxışları ilə davam etdirildi.
   Layihənin keçirilməsində əsas məqsəd iqtisadi yönümlü ixtisaslarda təhsil alan istedadlı və yüksək analitik düşüncə tərzi olan tələbələri bir araya gətirməkdən ibarətdir. Layihə iştirakçılarının seçimi iki mərhələdə aparılıb, müraciət edən 156 nəfər gənc içərisindən 90 nəfər müsahibə mərhələsinə dəvət edilib, 20 nəfər gənc layihəyədə iştirakçı hüququnu qazanıb.     
   Layihə iştirakçıları hər birində 5 nəfər olmaqla 4 komandaya bölünəcək. İştirakçılar onlara araşdırmaları üçün verilmiş mövzulara uyğun təqdimatlar hazırlamaqla bərabər müxtəlif təlim və seminarlarda iştirak edəcək. Həmçinin layihə müddətində müxtəlif sənaye müəssisələrinə ekskursiyalar da təşkil olunacaq. Layihənin icrası müddətində “Modern Marketing Group”, Lider Forex”, “Bank of Baku”, “Paşa Sığorta” şirkətləri ilə əməkdaşlıq edilməsi nəzərdə tutulub.