Binəqədi rayonunda “Hər şey vətən üçün” devizi altında xeyriyyə aksiyası keçirildi
Martın 4-də Binəqədi rayonunda “Hər şey vətən üçün” devizi altında xeyriyyə aksiyası keçirildi.
Binəqədi qəsəbəsi şəhid Qorxmaz Baxşıyev adına 179 saylı tam orta məktəbdə keçirilən tədbirdə Binəqədi Rayon İcra Hakimiyyəti başçısının müavini Aygün Əliyeva, Binəqədi Rayon İcra Hakimiyyəti başçısı Aparatının məsul işçiləri, Binəqədi qəsəbə bələdiyyəsinin sədri Aytac Əliyeva, müəllimlər, məktəblilər və valideynlər iştirak etdilər. Aksiyanın keçirilməsində əsas məqsəd məktəblilərdə vətənpərvərlik ruhunu aşılamaq idi.
179 saylı tam orta məktəbin təşəbbüsü, Binəqədi qəsəbə bələdiyyəsinin dəstəyi ilə məktəbin həyətində “Hər şey vətən üçün” xeyriyyə yarmarkasında məktəbin 36 ibtidai sinifi iştirak etdi, şagird və valideynlərin hazırladıqları əl işləri satışa çıxarıldı.
Yarmarkada daha çox fərqlənən 3 sinif fəxri fərmanla təltif edildi. Əldə olunan vəsait Silahlı Qüvvələrə Yardım Fonduna köçürüldü.
Aksiya başlamazdan əvvəl məktəblilərin ifasında vətənpərvərliyi tərənnüm edən musiqi parçaları səsləndirildi, milli adət-ənənələrimizi əks etdirən rəqslər nümayiş etdirildi.
Tədbirdə çıxış edən Binəqədi Rayon İcra Hakimiyyəti başçısının müavini Aygün Əliyeva milliliyimizi, adət-ənənələrimizi özündə əks etdirən aksiyanın keçirilməsinin ən mühüm tərəfinin əldə olunan vəsaitlərin vətənimizin keşiyində dayanan Silahlı Qüvvələrimiz üçün yaradılmış fonda köçürülməsinin olduğunu qeyd etdi.
