Binəqədi Rayon Ağsaqqallar Şurasının hesabat konfransı keçirildi
27 iyun 2024-cü il tarixində Binəqədi Rayon Ağsaqqallar Şurasının hesabat konfransı keçirildi.
Konfransda Binəqədi Rayon İcra Hakimiyyətinin başçısı Elxan Allahverdiyev, Azərbaycan Ağsaqqallar Şurası sədrinin birinci müavini, Milli Məclisin Səhiyyə komitəsinin sədri, akademik Əhliman Əmiraslanov, millət vəkili Kəmaləddin Qafarov, Yeni Azərbaycan Partiyası Binəqədi rayon təşkilatının sədri Vüsar İsmayılov, Azərbaycan Ağsaqqallar Şurasının İdarə Heyətinin üzvü, Binəqədi Rayon Ağsaqqallar Şurasının sədri, III dərəcəli Dövlət Ədliyyə müşaviri (Ədliyyə general-mayoru) Akif Rəfiyev, Binəqədi Rayon İcra Hakimiyyəti başçısının müavini Sevinc Süleymanova, Azərbaycan Ağsaqqallar Şurasının mətbuat katibi Rafiq Rzayev, ağsaqqallar, ziyalılar, şəhid valideynləri, qazilər, gənclər və digər ictimaiyyət nümayəndələri iştirak etdilər.
Konfrans iştirakçıları əvvəlcə Ümummilli Lider Heydər Əliyevin abidəsi önünə gül dəstələri düzərək, xatirəsini ehtiramla andılar.
Tədbirdə Azərbaycanın ərazi bütövlüyü, suverenliyi uğrunda həlak olan şəhidlərimizin və dünyasını dəyişən ağsaqqalların xatirəsi bir dəqiqəlik sükutla yad edildi.
Binəqədi Rayon İcra Hakimiyyətinin başçısı Elxan Allahverdiyev Azərbaycan Ağsaqqallar Şurası sədrinin birinci müavini, Milli Məclisin Səhiyyə komitəsinin sədri, akademik Əhliman Əmiraslanovu və digər tədbir iştirakçılarını salamlayaraq, respublikamızın hər yerində olduğu kimi, Binəqədi rayonunda da böyük hörmət və nüfuz sahibi olan ağsaqqalların fəaliyyətindən söz açdı. Ümummilli Lider Heydər Əliyevin “milli-mənəvi dəyərlərimizin qızıl fondu” adlandırdığı ağsaqqalların rayonun ictimai-mədəni həyatındakı xidmətlərindən, onların dəyərli məsləhətlərinə, öyüd-nəsihətlərinə hər zaman ehtiyacın olmasından danışdı. Azərbaycan Respublikasının Prezidenti cənab İlham Əliyevin rəhbərliyi ilə ölkəmizdə, o cümlədən də Binəqədi rayonunda həyata keçirilən inkişaf prosesindən bəhs edən natiq rayona və sakinlərə göstərdiyi qayğıya görə dövlət başçısına dərin minnətdarlığını ifadə edib. Konfransın işinə uğurlar arzuladı.
Binəqədi Rayon Ağsaqqallar Şurasının sədri Akif Rəfiyev ötən dövr ərzində görülən işlərlə bağlı hesabat məruzəsi ilə çıxış edərək bildirdi ki,
təşkilat üzvləri aktual mövzularla bağlı bir çox tədbirlərdə, yığıncaqlarda iştirak və çıxışlar ediblər, orta məktəblərdə və peşə təhsili məktəblərində gənclərlə mütəmadi görüşlər keçiriblər, onlarla maarifləndirici işlər aparıblar. Şəhidlərin anım mərasimlərində yaxından iştirak edərək, onların ailələrinə, qazilərə mənəvi dəstək olublar. Həmçinin “Heydər Əliyev İli” çərçivəsində Binəqədi Rayon İcra Hakimiyyəti və Yeni Azərbaycan Partiyası Binəqədi rayon təşkilatı ilə birgə tədbirlər keçiriblər. Binəqədi Rayon Ağsaqqallar Şurasının üzvləri növbədənkənar Prezident seçkilərində də öz fəallıqları ilə seçilərək Azərbaycan Respublikasının Prezidenti cənab İlham Əliyevi dəstəkləyiblər. Akif Rəfiyev onu da vurğuladı ki, hesabat dövründə həm özü, həm də rayon ağsaqqalları tərəfindən kütləvi informasiya vasitələrində müxtəlif aktual mövzularda məqalələri dərc olunub. Natiq vurğuladı ki, bundan sonra öz fəaliyyətlərini aktiv şəkildə davam etdirəcəklər.
Sonra çıxış edən Binəqədi Rayon İcra Hakimiyyəti yanında İctimai şuranın sədri, Rayon Ağsaqqallar Şurasının İdarə Heyətinin üzvü Aslan Mehdiyev, Əməkdar incəsənət xadimi, Rayon Ağsaqqallar Şurasının İdarə Heyətinin üzvü, professor İlham Rəhimli və digər natiqlər rayon ağsaqqallarının fəaliyyətindən bəhs etdilər. Vurğuladılar ki, ağsaqqallar hər zaman olduğu kimi, bu gün də milli-mənəvi dəyərlərimizin qorunmasına, əxlaqi normaların və sağlam həyat tərzinin təbliğinə öz töhfələrini verirlər. Binəqədi Rayon Ağsaqqallar Şurasının fəaliyyətini yüksək dəyərləndiriblər. Əminliklə bildiriblər ki, bundan sonra da ağsaqqallar Azərbaycan tərəqqisi naminə öz bilik və təcrübələrini əsirgəməyəcəklər.
Azərbaycan Ağsaqqallar Şurası sədrinin birinci müavini, Milli Məclisin Səhiyyə komitəsinin sədri, akademik Əhliman Əmiraslanov
çıxış edərək Şuranın sədri, millət vəkili, professor Eldar Quliyevin və İdarə Heyətinin üzvlərinin salamlarını konfrans iştirakçılarına çatdırdı. Bildirdi ki, Bakının ən böyük rayonlarından biri olan Binəqədi rayonunun Ağsaqqallar Şurasının üzvləri öz aktiv fəaliyyətləri ilə hər zaman seçiliblər. Çünki bu rayonda təşkilata çox təcrübəli insan, ölkəmizdə böyük xidmətləri olan Akif Rəfiyev kimi bir ziyalı rəhbərlik edir və o, rayon sədrləri arasında yeganə şəxsdir ki, həm də Azərbaycan Ağsaqqallar Şurasının İdarə Heyətinin üzvüdür. Sonra natiq Azərbaycan Ağsaqqallar Şurasının son illərdəki fəaliyyətindən bəhs edərək vurğuladı ki, ağsaqqalların cəmiyyətdəki nüfuzu nəzərə alınaraq möhtərəm Prezidentimiz cənab İlham Əliyevin göstərişi ilə 2020-ci ilin sentyabrında Şuranın növbədənkənar VIII qurultayı keçirilərək təşkilat yenidən formalaşdırılıb. Hazırda Şura öz məhsuladar fəaliyyətini uğurla davam etdirir. Azərbaycan Ağsaqqallar Şurasının gördüyü işlər barədə ətraflı məlumat verən Əhliman Əmiraslanov bildirdi ki, hər zaman Ulu Öndər Heydər Əliyevin zəngin irsini cəmiyyətimizdə təbliğ edən Şura öz fəaliyyətini 2023-cü il – “Heydər Əliyev İli”ndə daha intensiv şəkildə həyata keçirib. Daim dövlət başçısı cənab İlham Əliyevi ürəkdən dəstəkləyən, Azərbaycanın çiçəklənməsinə çalışan şəhər və rayon ağsaqqalları bu il fevral ayının 7-də keçirilən növbədənkənar prezident seçkilərində üzərilərinə düşən vəzifələri layiqincə yerinə yetiriblər. Təbliğat-təşviqat, o cümlədən səsvermə prosesində fəal iştirak edərək Azərbaycanın alternativsiz Prezidenti cənab İlham Əliyevi dəstəkləyiblər. Əhliman Əmiraslanov, həmçinin, öz nitqində Müzəffər Ali Baş Komandan cənab İlham Əliyevin rəhbərliyi ilə rəşadətli Ordumuzun qazandığı Zəfərdən, işğaldan azad olunmuş torpaqlarımızda həyata keçirilən genişmiqyaslı quruculuq işlərindən, vətəndaşlarımızın mərhələ-mərhələ öz ata-baba yurdlarında məskunlaşmalarından söz açdı. Natiq həmçinin, mövcud problemlərə də toxundu. Hazırda boşanmaların sayının gündən-günə artmasından, erkən və qohumlar arasında olan nikahlardan bəhs eddi. Vurğuladı ki, bu halların qarşısını almaq üçün ağsaqqallar daha aktiv fəaliyyət göstərməlidirlər. Binəqədi Rayon Ağsaqqallar Şurasının həyata keçirdiyi işləri yüksək qiymətləndirən Əhliman Əmiraslanov hər kəsə möhkəm cansağlığı və uğurlar arzuladı.
Sonda bəzi təşkilati məsələlər müzakirə olundu və Binəqədi Rayon Ağsaqqallar Şurasının İdərə Heyətinin tərkibi yenidən formalaşdırıldı.
