Vətən müharibəsi şəhidi Bəhmənli Manaf Bəhmən oğlunun şəhadətinin üçüncü ildönümü münasibətilə anım mərasimi keçirildi

Soyad: Bəhmənli
Ad: Manaf
Ata adı: Bəhmən
Doğum tarixi: 02.01.1998
Şəhid olub: 27.09.2020
Rütbə: əsgər
Təltifləri: “Vətən uğrunda”, "Hərbi Xidmətə görə" və “Kəlbəcərin azad olunmasına görə” medalları.

28 sentyabr 2023-cü il tarixində Vətən müharibəsi şəhidi Bəhmənli Manaf Bəhmən oğlunun şəhadətlərinin üçüncü ildönümü münasibətilə anım mərasimi keçirildi. Anım mərasimində iştirak edən Binəqədi Rayon İcra Hakimiyyəti başçısı Elxan Allahverdiyev, Yeni Azərbaycan Partiyası Binəqədi rayon təşkilatının sədri Vüsar İsmayılov, Rayon İcra Hakimiyyəti başçısının müavinləri, Səfərbərlik və hərbi xidmətə çağırış üzrə Dövlət Xidmətinin Binəqədi Rayon İdarəsinin rəisi Nicat Həsənov, hüquq-mühafizə orqanlarının rəhbərləri, RİH başçısı Aparatının şöbə müdirləri, Rayon Mənzil-Kommunal Təsərrüfatı Birliyinin nümayəndələri, RİH başçısının Binəqədi qəsəbə inzibati ərazi dairəsi üzrə nümayəndəsi, Binəqədi qəsəbə Bələdiyyəsinin sədri və əməkdaşları şəhidimizin yaxınları ilə birlikdə Biləcəri qəsəbəsi qəbiristanlığının ərazisində yerləşən Vətən müharibəsi Şəhidlərinin Xiyaban Kompleksində məzarını ziyarət etdilər, şəhidlərimizin ruhuna dualar oxundu, məzarı üzərinə əklil və tər güllər düzüldü.

Mərasimdə şəhidimizin əziz xatirəsini yad edərək onun ailə üzvlərinə və yaxınlarına ehtiramını bildirən Binəqədi Rayon İcra Hakimiyyəti başçısı Elxan Allahverdiyev vurğuladı ki, müqəddəs torpaqlarımız uğrunda haqq savaşında canından keçən qəhrəman şəhidlərimizin əziz xatirəsi qəlbimizdə əbədi yaşayacaqdır. Vətən müharibəsində qazanılan Şanlı Qələbəmiz bundan sonra da əsrlər boyu xalqımızın ən böyük vətənpərvərlik tarixi, Şanlı qəhrəmanlıq salnaməsi olacaqdır. Ali Baş Komandan cənab İlham Əliyevin müdrik hərbi strategiyası əsasında Azərbaycan Ordusu 44 günlük Vətən müharibəsi zamanı rəşadət və şücaət göstərərək düşmənin 30 ildən artıq davam edən hərbi təcavüzünə son qoymaqla Vətən və xalq qarşısında olan şərəfli vəzifəsini layiqincə yerinə yetirdi.

Daha sonra, şəhidin ehsan mərasimində iştirak etdilər.

Şəhidimizin valideynləri onlara göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya dərin təşəkkürlərini bildirdilər.

Vətənimizin ərazi bütövlüyünün bərpası uğrunda canını fəda etmiş Şəhidlərimizin ruhu qarşısında baş əyir, onlara Uca Tanrıdan rəhmət diləyirik!